თბილისის მერია დედაქალაქის მიწათსარგებლობის გენერალურ გეგმაში არსებულ ხარვეზებს დღეს გამოაქვეყნებს. ამის შესახებ „ინტერპრესნიუსს“ თბილისის მერიაში განუცხადეს. 
დედაქალაქის მიწათსარგებლობის გენგეგმა 6 ეტაპისგან შედგება. მერიას მიღებული აქვს 5 ეტაპის დოკუმენტაცია, თუმცა, ყველაზე მნიშვნელოვან, მე-6 ეტაპზე დოკუმენტში ხარვეზი სამჯერ დაფიქსირდა, რის გამოც, გენგეგმაზე მომუშავე „სითი ინსტიტუტ საქართველო“ 140 ათასი ლარით არის დაჯარიმებული. 

როგორც დედაქალაქის მერი კახა კალაძე აცხადებს, ქალაქის განვითარების დოკუმენტი ჯერ კიდევ დაუსრულებელია და მთელი რიგი მიმართულებით საფუძვლიანი სამუშაოებია გასაწევი, რათა ამ სახით გენგეგმის მიღებამ ქალაქს მომავალში დამატებითი პრობლემები არ შეუქმნას. 
თბილისის არქიტექტურის საქალაქო სამსახურის უფროსის, თემურ ბოლოთაშვილის ინფორმაციით, მერიას კითხვები აქვს ზონირების ცვლილების, ტრანსპორტისა და გზათა ქსელის განვითარებასთან დაკავშირებით. 

გენგეგმაზე მომუშავე ”სითი ინსტიტუტმა” დოკუმენტის სრულყოფისთვის 45 დღე ითხოვა.
დედაქალაქის გენგეგმაზე მუშაობა 2015 წელს დაიწყო და დოკუმენტის შესაქმნელად 2 800 000 ლარი გამოიყო