თბილისის რამდენიმე უბანში მასშტაბური სამშენებლო სამუშაოები დაიწყო. დიდ დიღომში, ვაკესა და ფონიჭალაში ხიდების და საგზაო ინფრასტრუქრუტის რეაბილიტაცია მომავალ წლამდე გასტანს. თბილისის მერის კახა კალაძის განცხადებით, სამუშაოებს პერიოდულად მოძრაობის შეფერხება ან სატრანსპორტო მარშრუტების ცვლილება მოჰყვება. 

„იოანე პეტრიწის ქუჩაზე 2 მილიონი ლარის სამუშაოები ჩატარდება, მიწისქვეშა კომუნიკაციები, გზაგამყოფები, ბორდიურები შეიცვლება. განახლდება ასფალტის საფარი და სხვა საგზაო ინფრასტრუქტურა. საპატრულო პოლიციასთან თანამშრომლობით შეიცვლება მოძრაობის სქემაც.“ - განაცხადა კახა კალაძემ. 

თბილისის მერის მოადგილის ირაკლი ბენდელიანის განცხადებით კი პარალელურ რეჟიმში სამუშაოები დაიწყო ფონიჭალასა და გლდანში. 

„დღეს ზემოდა ქვემო ფონიჭალაში ერთმანეთთან დამაკავშირებელი ხიდის და გზაგამტარის მშენებლობა იწყება. ჯამში 2.3 მლნ ლარი ღირებულების პროექტია, რომელიც წლის ბოლომდე დასრულდება. დაიწყო ასევე გლდანის ხიდების სრული სარეკონსტრუქციო სამუშაოები, რაც 8 მილიონიანი პროექტია და 2019 წლის ზაფხულში უნდა დასრულდეს. დღესვე ვაკეში რამიშვილის ქუჩაზე იწყება სამუშაოები. შეიცვლება მიწისქვეშა კომუნიკაცია, ბორდიურები, რასაც პერიოდულად შეზუდვები მოჰყვება გზებზე მოძრაობის დროს.“ - განაცხადა ირაკლი ბენდელიანმა.