თბილისის მერია მეტროსადგურ "მარჯანიშვილის" დაკონსერვებული ამოსასვლელის რეკონსტრუქციას იწყებს.როგორც ტრანსპორტის საქალაქო სამსახურში განაცხადეს, ამ ეტაპზე "მარჯანიშვილის" მეორე ამოსასვლელის დროებითი გადახურვაზე ტენდერი უკვე გამოცხადდა. ამასთან, მათივე ინფორმაციით, წელს გახსნიდან პირველად რეაბილიტაცია ჩაუტარდება მეტროსადგურ "გურამიშვილს". მთლიანად მეტროსადგურების რეაბილიტაციაზე წელს მერია 7,6 მილიონ ლარს დახარჯავს.

"ჩვენთვის გარდა მუნიციპალური ავტობუსებისა, მნიშვნელოვანია მეტროსადგურების მოდერნიზაცია და ტექნიკური მდგომარეობის გაუმჯობესება. სადგურების მოდერნიზაცია ნიშნავს იმას, რომ უსაფრთხოება უფრო მეტად იქნება უზრუნველყოფილი" - განაცხადა თბილისის მერმა დავით ნარმანიამ.

ტრანსპორტის საქალაქო სამსახურის ინფორმაციით კი უახლოეს პერიოდში დასრულდება „ახმეტელის", „ვარკეთილისა" და „ავლაბრის" რეაბილიტაცია. სამუშაობის საერთო ბიუჯეტი 1,5 მლნ ლარს შეადგენს.

მათივე ინფორმაციით, გაამოცხადებულია ტენდერი მეტროსადგურ „ავლაბარში" ზედა ვესტიბიულის გამაგრებითი და კოსმეტიკური სამუშაოების შესასრულებლად; მეტროსადგურ „მარჯანიშვილის" მეორე ამოსასვლელის დროებითი გადახურვაზე; „სამგორის" რეაბილიტაციაზე, რაც გულისხმობს ქვედა და ზედა გვირაბების, ვესტიბიულების, თაღების, ბოძების, პერსონალის ოთახების რემონტს ა.შ. ასევე, ტენდერი უკვე გამოცხადდა მეტროსადგურ „გურამიშვილის" რეაბილიტაციაზე, რაც ასევე მოიცავს ქვედა და ზედა გვირაბების, ვესტიბიულების, თაღების, ბოძების, პერსონალის ოთახების რემონტს და ა.შ. ზემოთჩამოთვლილი სამუშაოებისთვის ჯამურად გამოყოფილია 3,1 მლნ. ლარი.

ამასთან, როგორც ტრანსპორტის საქალაქო სამსახურში აცხადებენ, იგეგმება, მეროსადგურების „ნაძალადევისა" და „გოცირიძის" გადახურვა, რისთვისაც 0,5 მლნ ლარია გათვალისწინებული.

გარდა ამისა, 2017 წელს ესკალატორების რეაბილიტაციისთვის 2,5 მლნ ლარია გათვალისწინებული. დაგეგმილია ესკალატორების შეკეთება მეტროსადგურებში: „სადგურის მოედანზე", „ ახმეტელში", „ავლაბარში", „სამგორში", „ვარკეთილში", „მარჯანიშვილსა" და „ნაძალადევში".

წყარო : commersant.ge