info@myclient.ge 0322 728-528 574-77-24-04; 574 08 12 00; 574 08 12 01
18 July 2017
829
თბილისის გენგეგმა ტაქსების რეგულაციასაც ითვალისწინებს

თბილისის გენგეგმის მიხედვით, ტაქსებს რეგულაციები დაუწესდებათ. თბილისის განვითარების გეგმის მიხედვით, ახალმა რეგულირებამ უნდა შეამციროს „მოსეირნე" ტაქსთა რაოდენობა, მათი „გამოძახებითი" სერვისით ჩანაცვლებით, ცხელი ხაზით, მობილური აპლიკაციით და სხვა, რაც საგრძნობლად შეამცირებს ქალაქის გზებზე მუდმივად ცირკულირებად ტაქსთა რაოდენობას.

 

თბილისის განვითარების გეგმის ავტორების აზრით, ტაქსების სისტემის გაუმართაობა ძლიერ გავლენას ახდენს თბილისის „პარაზიტული" ხასიათის ტრაფიკის ჩამოყალიბებაში.

 

"ოფიციალური და არაოფიციალური ტაქსის მძღოლები ეჯიბრებიან ერთმანეთს მგზავრთა მოპოვებისათვის თბილისის გზებზე, მოულოდნელად ჩერდებიან ნებისმიერი მოთხოვნის შესაბამისად და დამატებით დატვირთვას ქმნიან ქსელზე უმგზავროდ მოძრაობისასაც, რითაც ხელს უწყობენ საცობების წარმოქმნას" - აღნიშნულია დოკუმენტში, რომლის განხილვაც საკრებულომ დღეს დაიწყო.

 

თბილისში ტაქსების რეგულაციის საკითხი დედაქალაქის მთავრობაში უკვე რამდენიმე თვეა აქტიურად განიხილება. რამდენიმე დღის წინ თბილისის ტრანსპორტის საქალაქო სამსახურის უფროსი მამუკა მუმლაძე მედიასთან საუბრისას აცხადებდა, რომ 2018 წლის დასაწყისიდან ტაქსების რეგულაციის საკითხზე კონკრეტული ღონისძიებები გატარდება და მძღოლებს გარკვეული ვალდებულებები დაეკისრებათ. მუმლაძის თქმით, ტაქსიში იქნება საინფორმაციო ტაბლო, რომელზეც განთავსებული იქნება ინფორმაცია მძღოლზე და მისი საკონტაქტო ტელეფონი და მონაცემები. ამასთან, მისივე თქმით, ტაქსების რეგულირება გაადვილდება, რადგანაც ავტობუსების პარკი კარგი ტემპით იზრდება და მგზავ­რთა ნაკადიც იმატებს.

 

გარდა ამისა, იყო საუბარი, რომ რეგულაციების ფარგლებში აიკრძალებოდა მარჯვენასაჭიანი და ორკარიანი ტაქსები. თუმცა ამასთან დაკავშირებით კონკრეტული გადაწყვეტილება მიღებული ჯერ არ არის. როდიდან ამოქმედდება ტაქსებზე რეგულაციები, ეს სავარაუდოდ, გენგეგმის დამტკიცების შემდეგ გახდება ცნობილი

წყარო : commersant.ge

საკონტაქტო ინფორმაცია
თბილისი, მიცკევიჩის ქ. N°11
574-77-24-04
0322 728-528
skype www.Myclient.ge
info@myclient.ge