თბილისის მერის, კახა კალაძის განცხადებით, მგზავრთა კომფორტული მომსახურების მიზნით, დედაქალაქს ახალი სამარშრუტო ხაზები დაემატება.

 მისი თქმით, დედაქალაქს ტრანსპორტის თვალსაზრისით სერიოზული პრობლემა აქვს და განმარტა, რომ ყვითელი ავტობუსების არსებული ავტოპარკი, მძიმე მდგომარეობაშია. „ჩვენ ომდევნო ოთხი წლის განმავლობაში დაგეგმილი გვაქვს ახალი, ევროპული ტიპის, ეკოლოგიურად სუფთა ავტობუსების შემოყვანა და გვინდა, სრულად ჩავანაცვლოთ ყვითელი ავტობუსები; ერთი რომ დისკომფორტს ქმნის მგზავრებისთვის და მეორე- ჰაერის დაბინძურებაში მნიშვნელოვანი ადგილი უკავია“

 დედაქალაქის მერმა ასევე განაცხადა, რომ იქამდე, ვიდრე ძველი ტრანსპორტის ახლით ჩანაცვლება მოხდება, თბილისის სამარშრუტო ხაზებ რამდენიმე ახალი მიმართლება დაემატება. 

 პირველი ეს არის მარშრუტი #54, რომელიც მგზავრებს დიდი დიღმის მე-4 მიკრორაიონიდან მაღლივი კორპუსის მიმართულებით, დავით აღმაშენებლის ხეივნის, მარშალ გელოვანისა და ვაჟა ფშაველას გამზირის გავლით მოემსახურება. აღნიშნული მარშრუტი დიდი დიღმის მოსახლეობას და მარშრუტის გზასავალზე მომლოდინე მგზავრებს საშუალებას მისცემს, ვაკე-საბურთალოს ტერიტორიის ნაწილსა და უნივერსიტეტის მაღლივ კორპუსს მოკლე დროში დაუკავშირდნენ.
 მეორე ახალი მარშრუტი არის #64, რომელიც სიმონ ჩიქოვანსა და ხილიანის დასახლებაში (და მის მიმდებარე ქუჩებზე) მცხოვრებ მოქალაქეებს მოემსახურება რუსთაველის გამზირისა და თავისუფლების მოედნის გავლით, ბარათაშვილის ქუჩის მიმართულებით. 
  ასევე,  #82  მარშრუტს დაემატება კიდევ ერთი ავტობუსი, რომელიც სოფელ ახალდაბის მოსახლეობას მოემსახურება. 

წყარო: bm.ge