თბილისის მერიამ დედაქალაქის არქიტექტურისა და კლიმატის გათვალისწინებით 74 ჯიშის ხე შეარჩია. ტიტა, ჭადარი, ტყემალი, ოლეანდრი, ხემარწყვა, იფანი, მუხის ნეკერჩხლის, ჭადრისა და ცაცხვის განსხვავებული სახეობა და კიდევ არაერთი ხე მოხვდა პრიორიტეტულ სიაში, რომელთა შერჩევის პროცესშიც მერიის გამწვანების სამსახურთან ერთად ექსპერტები და არასამთავრობო ორგანიზაციები იყვნენ ჩართული. დამატებით გამოიცა რეკომენდირებული ხეების ჩამონათვალიც. 

„მერიის მიერ გამოიცა აქტი თავისი დანართით, სადაც არის მოცემული მცენარეების ჯიშები და მახასიათებლები, რა სიმაღლის უნდა იყოს, რა დიამეტრი უნდა ჰქონდეს ღეროს და ასევე რა ხნოვანების უნდა იყოს. არის პრიორიტეტული ხეები, რომელიც არის 38 დასახელების და რეკომენრიდრებული 36 ხე.“ - განაცხადა BM.GE-სთან საუბარში თბილისის მერიის გამწვანების სამსახურის უფროსმა გიგა გიგაშვილმა. 

თბილისის მერის განცხადებით გამწვანების პოლიტიკა საკანონმდებლო ცვლილებებს მოიცავს. 

„კანონი, რომელიც მწვანე ნარგავების საკითხს ერთხელ და სამუდამოდ დაარეგულირებს, უახლოეს მომავალში იქნება მიღებული. ეს არის მწვანე და ეკოლოგიურად მდგრადი ურბანული განვითარებისკენ გადადგმული პირველი ნაბიჯები და ჩვენ მალე უკვე საკანონმდებლო დონეზე წარვადგენთ ცვლილებათა პაკეტს პარლამენტში, რაზეც უკვე მუშაობა დაწყებულია.“ - განაცხადა კახა კალაძემ მთავრობის სხდომაზე.

წყარო: bm.ge