თბილისში მოსახლეობის სიმჭიდროვე ერთ კვადრატულ კილომეტრზე 2198,8 კაცია, ეს კი ქვეყნის მასშტაბით ყველაზე მაღალი მაჩვენებელია. დედაქალაქის ყველაზე მჭიდროდ დასახლებული დიდუბის რაიონია -8,523.1 კაცი;  შემდეგ მოდის ისნის რაიონი- 7,360.2 კაცი; ჩუღურეთის რაიონი 4,547.4 კაცი; ნაძალადევის რაიონი-3,649.7 კაცი; გლდანის რაიონი-3,440.1; ვაკის რაიონი-1,846.1; საბურთალოს რაიონი-1,820.3 კაცი; სამგორის რაიონი- 1,386.5; კრწანისის რაიონი-1,269.5 და ბოლო ადგილს იკავებს მთაწმინდის რაიონი-654.2 კაცი.

უძრავი ქონების სააგენტო Myclient.ge-ს დირექტორი გვანცა გუჯელაშვილი ამბობს, რომ დედაქალაქის ყველაზე მჭიდროდ დასახლებული რაიონების ამგვარად გადანაწილება, დიდწილად,  უძრავი ქონების ფასებს უკავშირდება.  თუ დიდუბეში 1 კვ.მ-ს  550-650 დოლარად შეიძენ, მთაწმინდაზე 1 კვ.მ-ს ფასი 800 დოლარიდან იწყება. დიდუბის რაიონში ბინებს, ძირითადად, რეგიონებიდან ჩამოსული მოსახლეობა ყიდულობს, ეს კი   მისი სტრატეგიული მდებარეობითაა განპირობებული. ფასები სტრატეგიული ობიექტების ზრდის მიხედვითაც იცვლება, ბოლო პერიოდში გარეუბნებში სავაჭრო ცენტრების, კვების და სარესტორნო ობიექტების და  კომერციული ფართების მომრავლებამ მოსახლეობის მოთხოვნის ზრადა გამოიწვია, რამაც თავისთავად განაპირობა მშენებლობების მომრავლება. გარეუბნებში ფასები შედარებით  დაბალი და მისაღებია. რაც შეეხება ძველ თბილისს, ამ ტერიტორიაზე ინვესტორების მოთხოვნაა გაზრდილი, რაც თავისთავად მის ისტორიულ-კულტურულ ღირებულებებს და სტრატეგიულ ადგილმდებარეობას უკავშირდება.