სამშენებლო სფეროს მიმართულებით სანქციების გამკაცრება იგეგმება.  ცვლილებები პროდუქტის უსაფრთხოების კოდექსში აისახება, რომელიც თავის მხრივ, “შრომის უსაფრთხოების შესახებ“ ინიცირებულ საკანონმდებლო პაკეტს დაემატება. აღნიშნული პაკეტი მეორე მოსმენით განხილვის საგანია. 
დღეს სამშენებლო სამუშაოებზე შრომის უსაფრთხოებასთან დაკავშირებით კონსულტაციები შედგა. პარლამენტში ინიცირებული კანონპროექტის მიზანი, საკითხების სწორად დარეგულირებაა, საქმე ეხება მათ შორის სანქციების გამკაცრებას, ასევე  ადმინისტრირების გაუმჯობესებას,  საუბარია უნებართვო მშენებლობებთან დაკავშირებულ სანქციებზეც. 

უძრავი ქონების სააგენტო Myclient.ge-ს განცხადებით აღნიშნული ინიციატივების სასწრაფო წესით შემოტანა ბოლო პერიოდში გახშირებულ უბედურ შემთხვევებს უკავშირდება, რომლებიც, სამწუხაროდ ფატალურად დასრულდა. საქმე ეხება სამშენებლო სფეროში მუშების უსაფრთხოების ნორმების დაცვას, მათს უსაფრთხოებას ვინც უშუალოდ ახორციელებენ სიცოცხლისთვის საფრთხის შემცველ საქმიანობას.(საქართველოს კანონმდებლობის თანახმად, დამსაქმებელმა დასაქმებულს სრული ინფორმაცია უნად მიაწოდოს ყველა იმ ფაქტორის შესახებ, რომელიც მოქმედებს მის სიცოცხლეზე, ჯანმრთელობასა ან ბუნებრივი გარემოს უსაფრთხოებაზე. ამას გარდა, დამსაქმებელი მუდმივად უნდა ცდილობდეს, უსაფრთხოების პრევენციული სისტემის დანერგვით, თანამედროვე, უსაფრთხო ან ნაკლები საფრთხის შემცველი ტექნოლოგიების გამოყენებით, დასაქმებულთა სათანადო ინფორმირებით და მაქსიმალური პრევენციული ზომების მიღებით გააუმჯობესოს დასაქმების ადგილებში შრომის პირობები.) 

შეგახსენებთ, რომ ბოლო 1 თვის განმავლობაში მშენებლობას ორი მუშის სიცოცხლე შეეწირა, ბოლო ფაქტი გუშინ გურჯაანში დაფიქსირდა, რომელმაც 26 წლის მუშის სიცოცხლე იმსხვერპლა.

მშენებლობის ხარისხის კონტროლი  ვარკეთილის მეტროში ჭერის ჩამონგრევის შემდეგ წამოიწია წინა პლანზე. შეგახსენებთ, რომ ჭერის ჩამონგრევამ 14 ადამიანის ჯანმრთელობა დააზიანა. Myclient.ge დადებითად აფასებს სამშენებლო სფეროში სანქციების გამკაცრებას და იმედოვნებს, რომ უმოკლეს დროში აღმოიფხვრება ის ძირეული დეფექტები და პრობლემები, რომლებიც ადამიანების სიცოცხლეს უქმნიან საფრთხეს!