2017 წელს თბილისში არსებული 816 ავტობუსიდან 143 ერთეულს არ ეკუთვნის პერიოდული ტექნიკური ინსპექტირება (პტი), ხოლო დანარჩენი 673 ავტობუსიდან, 456 ერთეულმა (68%) ინსპექტირება ვერ გაიარა. 
ამის შესახებ აუდიტის სამსახურის მიერ მომზადებულ თბილისის მასშტაბით ავტოტრანსპორტის გამონაბოლქვით გამოწვეული ატმოსფერული ჰაერის დაბინძურების შემცირების ღონისძიებების ეფექტიანობის აუდიტის ანგარიშშია ნათქვამი. 

„მოპოვებული ინფორმაციით, ავტობუსების უმეტესი ნაწილი გაუმართავია და ისინი ვერ გადიან პტი-ს არსებული სტანდარტის შესაბამისად, რაც გამოწვეულია გამონაბოლქვის სისტემის გაუმართაობით. ასეთი ავტობუსების ექსპლოატაცია საქართველოს კანონმდებლობით დაუშვებელია. 

„მუნიციპალური განვითარების ფონდის“ დაკვეთით და „აზიის განვითარების ბანკის“ დაფინანსებით, 2015 წლის დეკემბერში შემუშავდა „თბილისის მდგრადი ურბანული ტრანსპორტის სტრატეგია“, რომელიც ოფიციალური დოკუმენტის სახით დამტკიცებული არ არის. მიუხედავად ამისა, სატრანსპორტო სამსახური ხელმძღვანელობს აღნიშნული სტრატეგიით, რის შედეგად ქალაქის მასშტაბით განხორციელებულია რიგი ღონისძიებები, მაგალითად, ახალი ავტობუსების შემოყვანა, ავტობუსის მოძრაობის ზოლების დამატება და სხვა, თუმცა აღნიშნულ სტრატეგიაში არ არის მკაფიოდ გაწერილი მცირე ზომის ავტობუსების შემოსაყვანად აუცილებელი ღონისძიებები,"- ნათქვამია ანგარიშში.

ამასთან, როგორც ანგარიშში ვკითხულობთ, თბილისის მერიიდან მიღებული განმარტებით, ავტობუსების მიერ პტი-ს გაუვლელობა  მხოლოდ გამონაბოლქვი სისტემის გაუმართაობით არის გამოწვეული. 

"ავტობუსების უმრავლესობა მოძველებულია, მათი ძრავის შიდა წვის სისტემა აღდგენას არ ექვემდებარება, ხოლო შეცვლა დიდ ხარჯებთან არის დაკავშირებული, შესაბამისად, ისინი არ აკმაყოფილებენ საკანონმდებლო ნორმებს ეკოლოგიური კუთხით. საგულისხმოა, რომ ახალი, ეკოლოგიურად გაცილებით სუფთა მუნიციპალური ტრანსპორტის არსებობის შემთხვევაში, მნიშვნელოვნად შემცირდება ჰაერში მავნე ნივთიერებების არსებობა, რაც მოსახლეობის ჯანმრთელობაზე პირდაპირ აისახება და ხელს შეუწყობს სახელმწიფო ბიუჯეტიდან ჰაერის დაბინძურებით გამოწვეული დაავადებების მკურნალობისთვის ასეული მილიონობით ლარის ოდენობის ხარჯის დაზოგვას,“-ნათქვამია ინფორმაციაში.
 

რა შედეგები აჩვენა მიკროავტობუსების ტექდათვალიერებამ? 

გარდა ავტობუსებისა, ტექდათვალიერება მიკროავტობუსებსაც ჩაუტარდა. თუმცა, აუდიტის სამსახურის ანგარიშს თუ დავეყრდნონით, „მიკროავტობუსების მიერ ინსპექტირების გავლის შესახებ ტრანსპორტის სამსახურიდან და აკრედიტაციის ცენტრიდან მოპოვებული ინფორმაცია ერთმანეთს არ შეესაბამება“. 

 მათივე ცნობით, 2017 წლის 4 აპრილიდან 6 ოქტომბრის ჩათვლით პერიოდში, ინსპექტირებაზე მისული მიკროავტობუსებიდან, თავდაპირველად 68 ერთეულმა ვერ გაიარა ინსპექტირება, ხოლო ავტოსატრანსპორტო საშუალების შეკეთების შემდეგ განმეორებითი ინსპექტირება დადებითი შედეგით 61 მიკროავტობუსმა დაასრულა. 

ამასთან, როგორც ანგარშშია ნათქვამი, აღსანიშნავია ის ფაქტი, რომ 68 უარყოფითად დასრულებული ინსპექტირებიდან, 65 შემთხვევა ფიქსირდება ერთ ცენტრში, რისი მიზეზის დადგენაც მიღებული განმარტების თანახმად, შეუძლებელია. 

„ტრანსპორტის სამსახურიდან მიღებული ინფორმაციით, ადგილობრივი მიმოსვლის მიკროავტობუსების მფლობელი ოთხივე კომპანია განმარტავს, რომ ყველა მიკროავტობუსმა 03.10.2016 – 03.04.2017 პერიოდში გაიარა პერიოდული ტექნიკური ინსპექტირება (პტი) კანონმდებლობის მოთხოვნების შესაბამისად, თუმცა ამის დამადასტურებელი საბუთები არ იქნა წარმოდგენილი.

აღსანიშნავია, რომ ტრანსპორტის სამსახურის მიერ წარმოდგენილი და აკრედიტაციის ცენტრიდან მოპოვებული ინფორმაცია მიკროავტობუსების მიერ ინსპექტირების გავლის შესახებ არ შეესაბამება ერთმანეთს. კერძოდ, ტრანსპორტის სამსახურის ინფორმაციით, ყველა მიკროავტობუსს აქვს გავლილი პტი კანონმდებლობის შესაბამისად, რაც არ დასტურდება აკრედიტაციის ცენტრის მონაცემებით. 

სატრანსპორტო სამსახურს არ გააჩნია კონტროლის მექანიზმი მიკროავტობუსების ინსპექტირების შედეგებზე. მიკროავტობუსების ნაწილის გამოუცხადებლობა ინსპექტირების ცენტრებში გამოწვეულია როგორც მერიის მხრიდან კონტროლის მექანიზმების არარსებობით, ასევე დარღვევებზე საპატრულო პოლიციის რეაგირების დაბალი მაჩვენებლით,“-ნათქვამია ანგარიშში.

ამასთან, როგორც ანგარიშიდან ირკვევა, 2016 წლის 3 ოქტომბრიდან 2017 წლის 3 აპრილამდე პერიოდში, ყვითელი მიკროავტობუსების 25% პერიოდული ტექნიკური ინსპექტირების გასავლელად არ გამოცხადდა; ხოლო გამოცხადებული -1 524 მიკროავტობუსიდან 4% უვარგისი გამოდგა. 

გასული წლის 4 აპრილიდან 6 ოქტომბრის პერიოდში კი ინსპექტირების გასავლელად მიკროავტობუსების 42% არ გამოცხადდა; ხოლო გამოცხადებული მიკროავტობუსების 0,40% უვარგისი გამოდგა. 
 

წყარო:bpn.ge