ეროვნული ბანკის რეგულაციამ, რომლის მიხედვითაც შემოსავლების დადასტურების გარეშე ბანკები სესხებს აღარ გასცემენ, ტექნიკის ბაზარზე გაყიდვების თითქმის განახევრება უკვე გამოიწვია. ამ სეგმენტში პროდქციის 50-60% სწორედ საბანკო განვადების გზით იყიდებოდა.

რეგულაციის გავლენით ცვლილებების მოლოდინშია სამშენებლო სექტორიც. როგორც მენაშენეთა ასოციაციის ხელმძღვანელი განმარტავს, ცვლილებები სხვა რეგულაციების წინააღმდეგი არ არის და ამბობს, რომ ამით პროცესი გაჯანსაღდება, თუმცა ამბობს, რომ სესხებზე ხელმისაწვდომობის შეზღუდვით მოსალოდნელია უძრავი ქონების გაყიდვები შემცირდეს. ცვლილებების კიდევ ერთი შედეგი უძრავ ქონებაზე ფასების კორექტირება იქნება.

,,ეს რეგულაცია დეველოპერულ სექტორს ნაწილობრივ შეეხება. ძირითადად აქ საუბარია სამომხმარებლო სესხებზე ანუ არაიპოთეკურ სესხებზე, მაგრამ ცხადია, ეს გავლენას იქონიებს. ჩემი ვარაუდით, თავდაპორველად სანამ დარეგულირდება მოთხოვნა-მიწოდება, შეიძლება შემცირდეს ფასებიც. საკმაო რაოდენობაა, ვინც ყიდულობს ფართებს ბანკების მეშვეობით. აქ მარტო ბინებზე არ არის საუბარი, უამრავი კომერციული ფართია, რომელიც ბანკებთან ურთიერთობით იყიდება’’-აცხადებს ირაკლი როსტომაშვილი.

დეველოპერების ნაწილი ამბობს, რომ ცვლილებები ძირითადად დაბალი სეგმენტის უძრავი ქონების ბაზარს შეეხება. შესაბამისად, ამ სეგმენტის გაყიდვები შემცირდება და დეველოპერები მოთხოვნის შესაბამისად უძრავ ქონებაზე ფასებსაც გადახედავენ.

,,მე ვფიქრობ, ეს შეეხება დაბალი სეგმენტის უძრავი ქონების ბაზარს. მცირე დოზით დაარტყავს საშუალო სეგმენტის უძრავ ქონებას. რაც შეეხება მაღალი სეგემენტს, არამგონია მას შეეხოს იმიტომ, რომ განსაკუთრებით ისტორიულ ზონებში, უძრავი ქონების, განსაკუთრებით ბინების გარკვეული დეფიციტია. აქედან გამომდინარე, არამგონია ამ სეგმენტს შეეხოს. თუმცა იმ რეგულაციებით, რაც შემოგვთავაზეს, დაბალ სეგმენტს დაარტყავს მოკლევადიან პერსპექტივაში. ფასები  და რეალიზაცია შემცირდება, თუმცა არამგონია დიდი პროცენტით. ფასების დიდი კორექტირების საშუალება არც აქვთ დეველოპერებს. ისედაც დაბალ ნიშნულზეა ფასები და თუ გავითავლისწინებთ იმას, რომ მერიამ ახალი რეგულაციები შემოიღო, იზრდება თვითღირებულება. არამგონია კიდევ ჰქონდეთ საშუალება დაწიონ ფასები, თუმცა ცოტა კორექტირება იქნება, რომ შეძლონ ფართების რეალიზაცია’’-აცხადებს GDG-ის ხელმძღვანელი, ბეჟან წაქაძე.

ეროვნული ბანკის რეგულაციის მიხედვით, მსესხებელს აღარ შეეძლება მისი შემოსავლის კონკრეტულ პროცენტზე მეტი სესხის მომსახურებაში გადაიხადოს.