თბილისის მერის მოადგილის მაია ბითაძის განცხადებით, თბილისში ტაქსების რეგისტრაცია-ნებართვიანობის პროცესი აგვისტოდან ნოემბრამდე პერიოდში გაიმართება. 

როგორც ბითაძემ  განაცხადა, დაახლოებით, 1 ნოემბრიდან რეგისტრაცის გავლის გარეშე ტაქსით მომსახურეობა უნებართვო საქმიანობად ჩაითვლება და პირის 200-ლარით დაჯარიმებას გამოიწვევს. 

„ტაქსებთან დაკავშირებით, პარლამენტმა სამი მოსმენით მიიღო კანონპროექტი. რამდენიმე დღეში ჩვენ დავიწყებთ აქტიურ მუშაობას საკრებულოს მიერ გამოსაცემ ორ აქტზე. პარლამენტმა კანონი მიიღო იმისთვის, რომ შეექმნა საფუძველი მუნიციპალიტეტისთვის, რათა დაერეგულირებინა ე.წ. M1 მსუბუქი ავტომობილებით მგზავრთა გადაყვანის საკითხი. ამასთან, ჩვენ აქტიურად ვიმუშავეთ ფინანსთა სამინისტროსთან. იყო მოარული ხმები, რომ ტაქსების განებართვიანება მოიაზრებს იმას, რომ გადასახადებით დაიბეგრებიან ტაქსის მძღოლები - ეს არის სრული სიცრუე. არანაირი ახალი გადასახადი არ იქნება. ყველა ის შეღავათიანი სარეჟიმო სისტემა, რაც მიკრობიზნესისთვის დღეს მოქმედია, შენარჩუნდება ტაქსის მძღოლებისთვის; უბრალოდ, საკრებულოს აქტის მიღების შემდგომ აგვისტოდან დაიწყება რეგისტრაცია-განებართვიანება და უკვე დაახლოებით, 1 ნოემბრიდან ყველა ის ადამიანი, რომელიც ტაქსის სერვისს ახორციელებს და არ აქვს გავლილი რეგისტრაცია, ჩაითვლება უნებართვო საქმიანობად და ადმინისტრაციულ სამართალდარღვევათა კოდექსით გათვალისწინებულ 200 ლარიან სანქციას დაექვემდებარება“, - განმარტა კალაძის მოადგილემ. 

მისივე თქმით, პირველ ეტაპზე ტაქსით სარგებლობის ლიცენზიისთვის საჭიროა პირადობის დამადასტურებელი მოწმობა და ერთჯერადი, დაახლოებით, 50-ლარიანი მოსაკრებლის შეტანა. 

„ეს არის ერთჯერადი გადასახადი, ფაქტობრივად ფურცლის ფულია. ჰიბრიდული ავტომობილებისთვის გადასახადი იქნება 50% სრული გადასახადის, ხოლო ელექტრომობილებისთვის - უფასო, ჩვენ ამით ვახალისებთ ამ მიმართულებას და სხვა სანებართვო პირობა არ იქნება", - განაცხადა მაია ბითაძემ. 

მისივე განმარტებით, საკრებულოს აქტში გაიწერება ის პირობა, რაც რეფორმის მეორე ეტაპზე ანუ 2019 წლის ბოლოდან იქნება და შეეხება ავტომობილის ფერს, ერთიან სტანდარტს და უსაფრთხოების სხვა ნორმებს. 

„ეს ყველაფერი ტექნიკური დათვალიერების პარალელურად მიმდინარეობს", - განაცხადა ბითაძემ.