„თუ  მშენებლობის ნებართვა არის პრობლემური, პრობლემას უქმნის კონკრეტულ ლოკაციას და არასწორია მშენებლობის განხორციელება ქალაქისთვის,  აუცილებლად გარკვეული ზომების მიღება გახდება საჭირო“-ამ საკითხზე ჟურნალისტებთან დედაქალაქის მერმა კახა კალაძემ ისაუბრა.

 

უძრავი ქონების სააგენტო Myclient.ge გაგაცნობთ თუ რა ღონისძიებებია საჭირო მშენებლობის ნებართვის მისაღებად:

 

ფიზიკურ ან იურიდიულ პირს, ან სხვა ორგანიზებულ წარმონაქმნს, რომელიც აპირებს რაიმე ობიექტის მშენებლობას, ესაჭიროება სახელმწიფო ორგანოს მიერ გაცემული მშენებლობის ნებართვა.

მშენებლობის ნებართვა გაიცემა საჯარო ადმინისტრაციული წარმოების წესით. ადმინისტრაციული წარმოება იწყება განცხადებისა და მასზე თანდართული საბუთების შეტანით.

 

განცხადებას უნდა დაერთოს:

-სანებართვო მოსაკრებლის გადახდის დამადასტურებელი საბუთი;

-წარმომადგენლის მიერ განცხადების შეტანის შემთხვევაში სათანადო წესით გაფორმებული რწმუნებულება;

-ადგილობრივი მმართველობის ორგანოს არქიტექტურის სამსახურთან შეთანხმებული არქტექტურული პროექტი (სამ ეგზემპლარად);

-საპროექტო დოკუმენტაცია (სამ ეგზემპლარად)

 

ნებართვის გამცემი ორგანო განცხადების რეგისტრაციიდან 3 დღის ვადაში ამოწმებს აკმაყოფილებს თუ არა წარდგენილი განცხადება და მასზე თანდართული მასალები დადგენილ მოთხოვნებს. განაცხადის ხარვეზი უნდა დადგინდეს ამ ვადაში.

 

მშენებლობის სანებართვო მოსაკრებელი

(რა თანხას ვიხდით მშენებლობის ნებართვისთვის)

მშენებლობის ნებართვისთვის გადასახადს ფიზიკური თუ იურიდიული პირები იხდიან ადგილობრივ ბიუჯეტში, ადგილობრივი თვითმართველობის წარმომადგენლობითი ორგანოს საკრებულოს მიერ დაწესებული ოდენობის მიხედვით, თუ ნებართვას არ გასცემს სხვა უწყება (შესაძლებელია ეს იყოს სამინისტრო).

საკრებულოს მიერ დაწყებული სამშენებლო მოსაკრებლის ოდენობა პროექტით გათვალისწინებული ფართობის თითოეული კვადრატული მეტრისთვის არ უნდა აღემატებოდეს ერთ ლარს, ხოლო საკურორტო ზონაში სამრეწველო ობიექტის მშენებლობისათვის - ხუთ ლარს.

 

მშენებლობის ნებართვის მიღება სავალდებულოა ნებისმიერ შემთხვევაში, თუნდაც პირი ობიექტს აშენებდეს ინდივიდუალური სარგებლობისთვის.

კანონით განსაზღვრულია ცალკეული სახის სამშენებლო სამუშაოები, რომლებიც არ საჭიროებენ მშენებლობის ნებართვას, თუმცა ისინი ხორციელდება ადგილობრივი მმართველობის არქიტექტურის სამსახურთან შეთანხმებული საპროექტო დოკუმენტაციის საფუძველზე, რომლის შესაბამისობაზე ზედამხედველობას ახორციელებს ადგილობრივი მმართველობის ორგანოს არქიტექტურულ-სამშენებლო საქმიანობაზე სახელმწიფო ზედამხედველობის ინსპექცია.

 

მშენებლობის ნებართვა არ გაიცემა შემდეგ საქმიანობებზე:

 

ა) საკარმიდამო მიწის ნაკვეთზე განთავსებულ დამხმარე სამეურნეო სათავსოს მოწყობაზე;

 

ბ) მცირე არქიტექტურული ფორმების (კიოსკი, საჩრდილობელი, საყვავილე, ბოსკეტი და სხვა), მოზარდთა ღია სპორტული და სათამაშო მოედნებისა და ღია ავტოსადგომების მოწყობაზე;

 

გ) სანახაობითი ღონისძიებების, სახალხო დღესასწაულებისა და ბაზრობა-გამოფენებისთვის საჭირო დროებითი შენობა-ნაგებობის მოწყობაზე;

 

დ) სარეკლამო კონსტრუქციის მოწყობაზე, რომლის ფირნიშის ფართობი არ აღემატება 27 კვ. მეტრს;

 

ე) შენობა-ნაგებობის, მათ შორის, ფასადის, ყველა სახის სარემონტო სამუშაოების განხორციელებაზე, არსებული გაბარიტების ფარგლებში;

 

ვ) ხაზობრივი ნაგებობებისა და სხვა საკომუნიკაციო ქსელების სარემონტო სამუშაოების განხორციელებაზე.