2013 წლის 26 თებერვალს ცეცხლი გაუჩნდა თბილისში მდებარე სავაჭრო ცენტრ "საბას". ხანძარმა 6000 კვადრატულ მეტრზე განთავსებული 100-ზე მეტი ავეჯის მაღაზია გაანადგურა. სავაჭრო ცენტრის მეპატრონე ხანძრის გამომწვევ მიზეზად ტექნიკურ გაუმართაობას გამორიცხავდა. ის ვარაუდობდა, რომ ხანძარი ხელოვნურად გააჩინეს. 2014 წლის 30 ივლისს ხანძარი გაჩნდა ნავთობბაზაზე. ცეცხლი წყალსადენის ქუჩაზე მდებარე "გალფის" ნავთობბაზას გაუჩნდა. ადგილზე აფეთქებების ისმოდა. შემთხვევის შედეგად კომპანიის ერთერთი თანამშრომელი დაშავდა. "საბაში" გაჩენილი ხანძრის შემდეგ, რამდენიმე თვეში თბილისის აკვა-პარკი დაიწვა. შემთხვევა 2013 წლის 17 ივლისს მოხდა. ძლიერი ხანძრის შედეგად მთლიანად დაიწვა ბუნგალოები, კონსტრუქციები. დაზიანდა აკვა-პარკის გვერდით მდებარე დევნილთა საცხოვრებელიც. ადგილზე 20 სახანძრო ბრიგადა მუშაობდა. 2015 წელს ქობულეთში მომხდარმა ტრაგედიამ მთელი საქართველო შეძრა. სასტუმროში გაჩენილ ხანძარს 3 ბავშვის სიცოცხლე ემსხვერპლა. ტრაგედია ე.წ. ჰასანას სასტუმროში მოხდა. პატარები ანსამბლის წევრებთან ერთად აჭარაში ფესტივალში მონაწილეობის მისაღებად იმყოფებოდნენ. 3 მოზარდი სასტუმროს ნომერში მარტო იყო, რა დროსაც სასტუმროს ცეცხლი გაუჩნდა. პატარებმა გაქცევა ვერ შეძლეს და ისინი სასტუმროს ნომერში დაიწვნენ. ამბობენ, რომ ხანძარი მათ ოთახში კონდიციონერს გაუჩნდა, ბავშვები ნომერში ჩაკეტილები იყვნენ და გამოსვლა ვეღარ მოახერხეს. ქობულეთის ტრაგედიიდან რამდენიმე დღეში, ხანძარს ქუთაისელი ახალგაზრდის სიცოცხლე ემსხვერპლა. ის სახლში ბაბუასთან ერთად იმყოფებოდა. როგორც ამბობენ, საცხოვრებელ კორპუსში ელექტროენერგია არ იყო და ხანძარი სანთელმა გამოიწვია. ამ დროს სახლში ორი ადამიანი იმყოფებოდა, ბაბუა და 20 წლის შვილიშვილი. მაშველებმა ისინი სახლიდან ცოცხალი გამოიყვანეს, თუმცა შვილიშვილი საავადმყოფოში მიყვანამდე გარდაიცვალა. 2015 წლის 13 მაისს აფეთქება მოხდა ბათუმში, რასაც ხანძარი მოჰყვა. ხანძარი კაფე-ბარ "მალიბუში" გაჩნდა. თვითმხილველების განცხადებით, ჯერ აფეთქება მოხდა, რის შედეგად ჩაიმსხვრა ბარის მინები და ადგილზე ცეცხლი გაჩნდა. შემთხვევის შედეგად ტაქსის მძღოლი დაშავდა, რომელსაც ავტომობილი კაფე-ბარის წინ ჰყავდა გაჩერებული. 2017 წლის 30 იანვარს "ბავშვთა სამყაროში" ცეცხლი გაჩნდა. შედეგად ასობით მოვაჭრე დაზარალდა და რამდენიმე ათას ლარიანი ზარალი მიადგათ. „ბავშვთა სამყაროს“ შენობა სრულად განადგურდა. სულ ცოტა ხნის წინ კი ე.წ ელიავას ბაზრობაზე გაჩნდა ხანძარი,რის შედეგადაც ასობით მაღაზია დაიწვა. ხანძრის გამომწვევი მიზეზები ამ დრომდე უცნობია. საქმეზე მიმდინარეობს გამოძიება.