თბილისის მერიის ვებგვერდზე ქალაქის განვითარების შესახებ მოქალაქეთა იდეების მიღება გრძელდება.

ამ ეტაპზე ვებგვერდზე 338 მიმდინარე, 255 დაბლოკილი, 466 არშემდგარი იდეა ფიქსირდება. 13 იდეა განხილვის პროცესშია, ორი უკვე შეთანხმებული, 1 კი უარყოფილია.

 მიმდინარე განცხადებებიდან ერთ-ერთი დედაქალაქში რამდენიმე ქუჩისთვის სახელის გადარქმევას და წარმატებული სპორტსმენების სახელწოდების დარქმევას გულისხმობს.

„სურვილი მაქვს რომ წარმატებული სპორტსმენების სახელობის ქუჩები გვქონდეს თბილისში. (ტალახაძე, პეტრიაშვილი და ა.შ.). მოგეხსენებათ ბევრი ისეთი ქუჩაა, რომელსაც შეიძლება გადაერქვას სახელი. მაგალითად, ავლაბარში ვცხოვრობდი, სადაც თელავის, გურჯაანის, ლაგოდეხის ქუჩებია. დარწმუნებული ვარ არ ეწყინება მაგალითად თელავს, რომ შეეცვალოს დასახელება. მოტივაცია იქნება თვითონ ამ სპორტსმენების, მათი შვილებისთვისა და მომავალი თაობისთვისაც. მაგალითისთვის, ნიკოლოზ შერაზადიშვილის (პირველი მსოფლიო ჩემპიონი კაცი ესპანეთის ისტორიაში) ქუჩა გაიხსნა მადრიდში და ნიკასგან ვიცი, რომ მაგარი სტიმულია და მაგრად უხაროდა,“-აღნიშნულია მოქალაქის განცხადებაში. აღნიშნულ იდეაზე ხმის მიცემის ვადა 2019 წლის 23 თებერვლამდეა.