სამშენებლო კანონდარღვევებზე, შესაძლოა, აღსრულების პროცედურა შეიცვალოს. 

სახელმწიფო აუდიტის სამსახური, თბილისის მერიასა და პარლამენტს შესაბამისი საკანონმდებლო ცვლილებების მიღებისკენ მოუწოდებს. 

აუდიტი მოითხოვს, რომ საჯარიმო დოკუმენტის კანონდამრღვევისთვის ჩაბარების პროცედურა შსს-ს მსგავსი იყოს. 

მოქმედი ადმინისტრაციული კოდექსის მიხედვით, დაჯარიმების შესახებ აქტი ძალაში მხოლოდ მაშინ შედის და აღსრულებაც შესაძლებელი ხდება, თუ კანონდამრღვევი დოკუმენტს ჩაიბარებს. იმ შემთხვევაში, თუ პირი შეტყობინებას არ ჩაიბარებს, სამართლებრივი აქტი ძალაში ვერ შედის. 

როგორც აუდიტის სამსახურში აცხადებენ, კანონდამრღვევთა ნაწილი სარგებლობს ამ ხარვეზით და დოკუმენტს არ იბარებენ, რის გამოც საჯარიმო სანქციების აღსრულება ვერ ხერხდება. 

აღნიშნულ დასკვნამდე, აუდიტის სამსახური თბილისის მერიის ზედამხედველობის სამსახურის 2016 წლის საქმიანობის შესწავლის შემდეგ მივიდა. 

ამ პერიოდში სამსახურმა სამშენებლო სამართალდარღვევების 1178 ფაქტი გამოავლინა, დაკისრებულმა ჯარიმებმა კი 6 მილიონს გადააჭარბა, აქედან 104 ფაქტზე გამოცემული სამართლებრივი აქტი ძალაში არ არის შესული და ვერც დაკისრებული ჯარიმის − 873.0 ათასი ლარის ამოღება მოხერხდა დღემდე. 

,,აღუსრულებელი სამართლებრივი აქტებისა და ამოუღებელი ჯარიმების წილი საკმაოდ მაღალია. აღნიშნული მიუთითებს იმაზე, რომ მოქმედი რეგულაციებისა და არსებული პრაქტიკის პირობებში, სამშენებლო სამართალდარღვევებზე ეფექტური რეაგირება ვერ ხორციელდება“, - აცხადებენ აუდიტის სამსახურში. 

უწყებაში მიიჩნევენ, რომ საჯარიმო აქტის ჩაბარების პროცედურა ისეთივე უნდა გახდეს, როგორც ეს შსს-ს ჯარიმების შემთხვევაში ხდება. 

როგორც ცნობილია, ავტოდარღვევის საჯარიმო დოკუმენტი, ჩაუბარებლობის შემთხვევაში, უწყების ვებ-გვერდზე ქვეყნდება და 30 დღის გასვლის შემდეგ ის ჩაბარებულად ითვლება. 

,,ამ გზით, მუნიციპალიტეტს ექნება ეფექტიანი ბერკეტები, სამართალდარღვევებზე გამოტანილი გადაწყვეტილებების აღსრულების პროცესში“, - მიაჩნიათ აუდიტის სამსახურში.