სახელმწიფო აუდიტის სამსახურში აცხადებენ, რომ თბილისის ზედამხედველობის სამსახურის რეაგირება დედაქალაქში მიწების თვითნებურად დაკავებაზე არასრულყოფილი იყო. 

ამის შესახებ საუბარია თბილისის ზედამხედელობის სამსახურის 2016 წლის საქმიანობის შემოწმების ანგარიშში, რომელიც აუდიტის სამსახურმა გამოაქვეყნა. 

დოკუმენტის მიხედვით ირკვევა, რომ მიწის თვითნებურად დაკავების 36 შემთხვევაში (საერთო ფართი − 17 330 კვ.მ) ზედამხედველობის სამსახურს რეაგირება არ მოუხდენია და არც საჯარიმო სანქციები გამოუყენებია. 

აუდიტორი ეჭვს გამოთქვამს, რომ სუსტი კონტროლის მექანიზმების გამო, არსებობს რისკი, რომ აღნიშნული სახის დარღვევები თბილისის მუნიციპალიტეტის ტერიტორიაზე მნიშვნელოვნად მეტი იყოს. აღნიშნული ნაკვეთები ქონების მართვის სამსახურმა აუქციონებით გაასხვისა, მათივე ვებ-გვერდებზე კი გამოქვეყნებულია ინფორმაცია, ამ ნაკვეთების თვითნებური დაკავების შესახებ, რისთვისაც აუდიტის დასკვნით, ზედამხედველობის სამსახურს ყურადღება არ მიუქცევია. 

,,სამსახურის პასუხისმგებელი პირების განმარტებით, ისინი არ ფლობდნენ სრულ ინფორმაციას თვითნებურად დაკავებული ფართობების შესახებ“, - ნათქვამია აუდიტის დასკვნაში. 

უწყება მუნიციპალიტეტს მოუწოდებს, შეიმუშაოს წესი, რომელიც მერიის სამსახურებს შორის კოორდინაციას და ინფორმაციის ეფექტურად გაცვლას უზრუნველყოფს. 

შემოწმების შედეგად დადგინდა, რომ 2016 წელს ზედამხედველობის სამსახურმა ჯამში მიწების თვითნებური დაკავებისა და უკანონო მშენებლობის 450 ფაქტი გამოავლინა, დარიცხულმა საჯარიმო სანქციებმა კი, 3,9 მილიონი ლარი შეადგინა. აქედან, გადახდილია 754.0 ათასი ლარი, ხოლო 3 170.0 ათას ლარზე მიმდინარეობს საქმის წარმოება სხვადასხვა ინსტანციაში.