ცემენტი, არმატურა, ელექტროკაბელები და პლასტმასის მილები ხარისხობრივ კონტროლს გაივლიან. 

დღეიდან ძალაში შედის ტექნიკური რეგლამენტი, რომლის თანახმად სამშენებლო პროდუქტების ადგილობრივი მწარმოებლები და იმპორტიორები ვალდებულნი არიან წარმოადგინონ დადგენილებით დამტკიცებული დოკუმენტაცია, რომელიც ადასტურებს სამშენებლო პროდუქტების შესაბამისობას ტექნიკური რეგლამენტის მოთხოვნებთან და უზრუნველყოფს ბაზარზე განთავსებული პროდუქციის უსაფრთხოებას. 

იმპორტიორები ვალდებულები ხდებიან, შემოსავლების სამსახურს წარუდგინოს სამშენებლო პროდუქტის თვისებების დეკლარაცია ან შესაბამისი დოკუმენტები, სამშენებლო პროდუქტის იმპორტის სასაქონლო ოპერაციაში მოქცევისა და ამ დოკუმენტის ტექნიკური და სამშენებლო ზედამხედველობის სააგენტოსათვის მიწოდების მიზნით. 

შემოსავლების სამსახური კი, ვალდებულია, საქართველოს საბაჟო ტერიტორიაზე შემოტანისას გააჩეროს და არ დაუშვას იმპორტის გზით ისეთი სამშენებლო პროდუქტის ბაზარზე განთავსება, რომელზეც არ იქნა წარდგენილი შესაბამისი დოკუმენტები და აღნიშნულის შესახებ აცნობოს სააგენტოს. 

კონტროლს დაქვემდებარებულ პროდუქციაზე ზედამხედველობას, ეკონომიკისა და მდგრადი განვითარების სამინისტროს ტექნიკური და სამშენებლო ზედამხედველობის სააგენტო განახორციელებს. შეუსაბამობების გამოვლენის შემთხვევაში, უწყებას შეეძლება გაატაროს შემზღუდველი ღონისძიებები, როგორიცაა: რეალიზაციის შეჩერება, ამოღება, გამოთხოვა და განადგურება.