მენაშენეთა ასოციაციის ხელმძღვანელის, ირაკლი როსტომაშვილის განცხადებით, 2019 წლის იანვარში, გასული წლის ანალოგიურ პერიოდთან შედარებით, სამშენებლო კომპანიებში უძრავი ქონების გაყიდვის მონაცემები, დაახლოებით, 50%-ით შემცირდა. 

როგორც როსტომაშვილმა განაცხადა, აღნიშნული ვითარება კომერციულ ბანკებში ფიზიკური პირების დაკრედიტებასთან დაკავშირებით, 2019 წლიდან ამოქმედებულმა შეზღუდვებმა განაპირობა. 

„ჩემი ვარაუდით, დეველოპერულ სექტორს ეს სერიოზულ პრობლემას შეუქმნის, მაგრამ ერთი თვის მონაცემებით მსჯელობა, არასწორია ხოლმე, თუმცა მე მაქვს კონტაქტი ბანკებთანაც, სადაც იპოთეკური სესხების გაცემა 2018 წლის იანვართან შედარებით 10-ჯერ შემცირდა“,- განაცხადა ირაკლი როსტომაშვილმა. 

მისივე განმარტებით, ბოლო პერიოდში დეველოპერული ბიზნესისთვის ერთდროულად ბევრი რეგულაცია შევიდა ძალაში, რაც გარდა სამშენებლო აქტივობების შემცირებისა, ქვეყანაში სხვა პრობლემებსაც ქმნის. 

„სამშენებლო ობიექტების არეალი თუ განახევრდება, ეს იმას ნიშნავს, რომ დასაქმებულთა რაოდენობაც განახევრდება. ის ადამიანები კი, რომლებიც ოჯახს თვიდან თვემდე სამშენებლო ობიექტებზე მუშაობით არჩენენ და სამსახურს კარგავენ, სხვა ქვეყნებში გადიან“ - აღნიშნა მან.

შეგახსენებთ, რომ ეროვნული ბანკის დადგენილებით, 2019 წლის 1 იანვრიდან ფიზიკური პირების დაკრედიტება შეიზღუდა. მოქალაქეები სესხებს თავიანთი შემოსავლების შესაბამისად მიიღებენ.