მენაშენეთა ასოციაციის წევრი და კომპანია „არსის“ დირექტორი თვლის, რომ კოეფიციენტების გაყიდვის აკრძალვა თბილისში მიწის ფასს სტაბილურს და პროგნოზირებადს გახდის. თორნიკე აბულაძის თქმით, რეგულაციების ამოქმედება საჭიროა, რადგან დედაქალაქში მენაშენეების 95% მიღებული სანებართვო პირობების შეცვლასა და კოეფიციენტების ზრდის ხარჯზე, მეტი მოგების მიღებას ცდილობს.

„ზოგადად, კოეფიციენტის გაზრდის უფლების მიცემა არის გამონაკლისი შემთხვევა. მაგრამ დღეისათვის თბილისში მშენებლობების 95% არის სწორედ გამონაკლისის წესით აშენებული, რაც არასწორია. ამასთან, ცხადია, რომ როცა კოეფიციენტის გაზრდა კომპანიას ნაცნობობითა და მეგობრობით შეეძლო, ეს მოცემულობა ზრდიდა აღნიშნული მიწის ღირებულებას. შესაბამისად, თბილისში არ იყო სტაბილური ფასები. ქალაქში მიწის ფასი ხშირ შემთხვევაში არა მისი ლოკლაციითა და რეალური ღირებულებით, არამედ ნაცნობობით რეგულირდებოდა. ეს უკვე ქმნიდა კორუფციის რისკებს მერიის შესაბამის სამსახურში და ამასთანავე, ურევდა ბაზარს. როგორც კი კოეფიციენტების გაყიდვა აიკრძალება, დედაქალაქში მიწის ფასი გახდება სტაბილური და გაცილებით პროგნოზირებადი.“-განაცხადა თორნიკე აბულაძემ.

შეგახსენებთ, რომ თბილისში სამშენებლო სექტორში ახალი რეგულაციები შემოდის. დედაქალაქის მერის კახა კალაძის განცხადებით, აიკრძალება K2 კოეფიციენტების გაყიდვა და კოეფიციენტების მატება. რეგულაცია გავრცელდება ყველა ნებართვასა და განაშენიანების რეგულირების გეგმაზე, რომელიც რეგულაციის ამოქმედების მომენტიდან იქნება მიღებული წარმოებაში.