ახალი ორგანული კანონის მიღების შემდეგ, სასოფლო-სამეურნეო მიწის რეალიზაციის დროს შეიძლება აღმოაჩინოთ, რომ თქვენი მიწის ნაკვეთის კერძო პირებზე გაყიდვის უფლება აღარ გაქვთ და მისი ერთადერთი მყიდველი მხოლოდ სახელმწიფო შეიძლება იყოს. 

შესაბამისი ცვლილებას მიწის შესახებ კანონის პროექტი ითვალისწინებს. ინიციატივის მიღების შემთხვევაში, მთავრობას კერძო საკუთრების “უპირატესი შესყიდვის უფლება” გაუჩნდება. 

“სასოფლო-სამეურნეო დანიშნულების მიწის ნაკვეთის სახელმწიფოს უპირატესი შესყიდვის უფლება ნიშნავს სახელმწიფოს უფლებას, შეიძინოს მიწის ნაკვეთი მესაკუთრისგან იმ ფასად და იმავე პირობებით, რომლებითაც მესაკუთრე ამ ქონების მესამე პირისათვის მიყიდვას აპირებს”,- ნათქვამია კანონპროექტში. 

ეს ნიშნავს, რომ გარიგებას, რომელსაც კერძო პირთან დებდით, ახლა სახელმწიფოსთან დადებთ. ხოლო, იმას თუ რა არის “სტრატეგიული” მნიშვნელობის მიწის ნაკვეთი, ახლადშექმნილი სსიპ-ი “მიწის მდგრადი განვითარების სააგენტო” განსაზღვრავს. 

კანონპროექტის ავტორის, "ქართული ოცნების" წევრის ოთარ დანელიას თქმით, უპირატესი შესყიდვის უფლების გამოყენება მხოლოდ საგანამონაკლისო შემთხვევებში შეიძლება მოხდეს. 

დეპუტატის განცხადებით, “სტრატეგიული” მნიშვნელობის სასოფლო-სამეურნეო მიწის ნაკვეთს სახელმწიფო შეიძენს რათა, ის გაამსხვილოს და ისევე პრივატიზების მიზნით, შესთავაზოს კერძო სექტორს. დანელია მიწის შესყიდვის მიზეზად უსაფრთხოების საკითხებსაც ასახელებს. 

“დავუშვათ, რომ მე და თქვენ ერთმანეთთან ვაფორმებთ მიწის ნასყიდობის ხელშეკრულებას. მე თქვენთვის რა ფულიც უნდა გადამეხადა, თქვენ იმ ფულს გადაგიხდით სახელმწიფო და ის გახდება მისი მესაკუთრე. შესაბამისად, გარიგების საპირწონედ, რაც კერძო მხარეებს შორის უნდა დადებულიყო, დაიდება გარიგება სახელმწიფოსა და მიწის მესაკუთრეს შორის. 

თავის დროზე მოგეხსენებათ სხვადასხვა პერიოდში ფრაგმენტულად გაიყიდა მიწის ნაკვეთები. ზოგიერთ შემთხვევაში, ამის შედეგად მაგალითად სახელმწიფოს კუთვნილ 100 ჰექტარის მიწის ნაკვეთის შუაგულში არის ამოგლეჯილად 5 ჰექტარის კერძო ნაკვეთი. თქვენ თუ მოინდომებთ ამ მიწის რეალიზებას და კონკრეტული პირი გთავაზობთ ამაში თანხას, სახელმწიფო გადაგიხდით თქვენ თანხას. 

იქმნება მიწის მდგრადი განვითარების სააგენტო, რომელიც გაუწევს რეკომენდაციას თუ რა იქნება მსგავსი მნიშვნელობის მიწები. ალბათ ათასში ერთი შემთხვევა შეიძლება იყოს ერთი შემთხვევა, როდესაც სახელმწიფო ამ მექანიზმს გამოიყენებს. 

როდესაც სახელმწიფო შეძლებს რომ შეკრას ერთიანი მასივი, ის უკვე ამ მიწას კრიტიკულ დატვირთვას მიანიჭებს და ინტერესთა გამოხატვითა თუ საინვესტიციო გეგმით სულ სხვა ღირებულებასა და დატვირთვას შესძენს მას", - ამბობს ოთარ დანელია. 

ახალი ორგანული კანონი, შესაბამისობაში იქნება ახალ კონსტიტუციასთან, რომელიც უცხოელებს საქართველოში მიწების შეძენას უკრძალავს. 

“სასოფლო-სამეურნეო დანიშნულების მიწა, როგორც განსაკუთრებული მნიშვნელობის რესურსი, შეიძლება იყოს მხოლოდ სახელმწიფოს, თვითმმართველი ერთეულის, საქართველოს მოქალაქის ან საქართველოს მოქალაქეთა გაერთიანების საკუთრებაში. გამონაკლისი შემთხვევები შეიძლება დადგინდეს ორგანული კანონით, რომელიც მიიღება პარლამენტის სრული შემადგენლობის არანაკლებ ორი მესამედის უმრავლესობით,” - წერია საქართველოს კონსტიტუციაში.