სასოფლო-სამეურნეო მიწის საკუთრების შესახებ კანონპროექტის მიხედვით, კანონის ამოქმედების დროს, თუ უცხოელი არ გამოიყენებს სასოფლო-სამეურნეო დანიშნულების მიწას ზედიზედ 3 წლის განმავლობაში, მას ჯარიმა დაეკისრება. სანქციები ეხება ფინანსურ ინსტიტუტებსაც, თუ 2 წლის განამვლობაში არ მოახდენენ მიწების გასხვისებას. 

კანონპროექტი ასევე ითვალისწინებს, უცხოელის მიერ მემკვიდრეობით მიღებული მიწის ნაკვეთის გამოყენების ვალდებულებას. მისი შეუსრულებლობის შემთხვევაში უცხოელმა უნდა მოახდინოს მიწის გასხვისება. მიწის გასხვისება მოუწევს ასევე იურიდიულ პირსაც, თუ საინვესტიციო გეგმით გათვალისწინებულ ვალდებულებებს არ შეასრულებს. გაუსხვისებლობის შემთხვევაში, მიწა სახელმწიფო საკუთრებაში გადავა. 

კანონპროექტის ავტორის ოთარ დანელიას განცხადებით, შესაძლოა, მიწის გასხვისების ვალდებულება საჯარიმო სანქციით ჩანაცვლდეს. 

"ჩვენ ამ ეტაპზე ვმსჯელობთ ამ საკითხთან დაკავშირებით, ვინაიდან როცა შემოვიღეთ გაყიდვის საკითხი, რეტროაქტიურობის თემა ჩნდებოდა, რომელიც დისკუსიის საგანი გახდა, შესაბამისად, ჩვენ ეს ჩავანაცვლეთ საჯარიმო სანქციით. სახელმწიფომ უნდა მიიღოს შემოსავალი იმ შემთხევაში, თუ არ მუშავდება მიწის ნაკვეთები. აქ არის ზღვრული დადგენილი რაოდენობა, მათ შორის 20-30 ათას ლარამდე შეიძლება იყოს საჯარიმო სანქციები უცხო ქვეყნის ფიზიკურ პირებზეც. 

ჯერ არ გაგვივლია ეს თემა, ვინაიდან არ დაწყებულა საკომიტეტო განხილვები. ეს არის ერთ-ერთი საკითხი, რომელიც არის დისკუსიის საგანი, რადგან ჩვენ ვალდებულს ვხდით გაასხვისონ მიწის ნაკვეთი, რაც საკუთრების ნაწილში მაინცდამაინც პოზიტიური მესიჯი არ იყო, თუმცა ჩვენ პირველ რიგში, გამოვდივართ ეროვნული ინტერესებიდან", - აცხადებს ოთარ დანელია. 

კანონი სასოფლო-სამეურნეო მიწის ფლობას უკრძალავს ფინანსურ ინსტიტუტებსაც, რომელთა მფლობელები უცხოელები არიან. ისინი ვალდებულნი არიან, 2 წლის ვადაში გაასხვისონ მიწა, წინააღმდეგ შემთხვევაში, 80 ათას ლარამდე ჯარიმის გადახდა მოუწევთ.