ძველი შენობების ნაწილში ენერგოეფექტური ღონისძიებების გატარება სავალდებულო იქნება. ეკონომიკის სამინისტროს სამშენებლო დეპარტამენტის კონსულტანტი დავით გიგინეიშვილი განმარტავს, რომ ასეთ შენობებში ენერგოეფექტური ღონისძიებების გატარების ვალდებულება იქნება მხოლოდ იმ შემთხვევაში, თუკი რეკონსტრუქციის ღირებულება შენობის ღირებულების 25%-ს აღემატება. 

„ეს არის ევროკავშირის რეკომენდაცია, რომელიც ევროკავშირის წევრ ქვეყნებში მოქმედებს და საქართველო ევროკავშირთან ასოცირების ხელშეკრულების ფარგლებში ვალდებულია, გაატაროს ენერგოეფექტური ღონისძიებები სამშენებლო სექტორში. ჯერჯერობით კანონი მიღებული არ არის , გადაგზავნილია პარლამენტში და მიმდინარე წელს იმსჯელებენ, შემდეგ კი დაიწყება უკვე ქმედითი ნაბიჯების გადადგმა”, - აღნიშნა დავით გიგინეიშვილმა.