info@myclient.ge 0322 728-528 574-77-24-04; 574 08 12 00; 574 08 12 01
02 April 2019
224
რა ზომისაა და რა ცვლილებებს გადის თბილისის უძრავი ქონების ბაზარი?

TBC Capital-მა საქართველოს სამშენებლო და უძრავი ქონების ბაზრის ზომაზე, მის თავისებურებებსა და მომავალი განვითარების პერსპექტივებზე ანალიტიკური ანგარიში წარადგინა. 

დოკუმენტის უმთავრესი მიგნებების მიხედვით, მომავალში საქართველოს უძრავი ქონების ბაზარზე კვადრატული მეტრის ფასის სტაბილური მატება არის მოსალოდნელი, რაც ამ სექტორის საინვესტიციო პოტენციალს უსვამს ხაზს. 

ანგარიშში საუბარია მიზეზთა ერთობლიობაზე, რომლებიც უძრავი ქონების ფასებზე ახდენენ გავლენას. ზოგიერთი მათგანი, მათ შორის, თბილისის მერიის მხრიდან სამშენებლო ნებართვების გაცემის გამკაცრება, ფასზე ზრდის მიმართულებით მოქმედებს, ხოლო სხვა ფაქტორები კი შემცირების მიმართულებით მოქმედებენ. 

რა ზომისაა და რა ცვლილებებს გადის თბილისის უძრავი ქონების ბაზარი? 

4,100,000,000 ლარი, სწორედ ამდენი გადაიხადეს საქართველოს და უცხოეთის მოქალაქეებმა, რათა 2018 წლის განმავლობაში თბილისში 34,591 ბინა შეეძინათ. ეს 2017 წელთან შედარებით მთელი 31%-ით მეტია. ზრდის აღნიშნული ტემპი პრაქტიკულად რეკორდულია, ის 2017 წელს არსებულთან შედარებით თითქმის ორჯერ მეტია. 

TBC კაპიტალის ანგარიშის მიხედვით, გაყიდული ბინების 65% ახალაშენებულ ბინებს წარმოადგენდა. გასული წლის განმავლობაში თბილისში სულ 2,318,000 კვადრატული მეტრი გაიყიდა, ეს ნიშნავს, რომ საშუალო ბინის ზომა 67 კვადრატულ მეტრს შეადგენდა. კვლევის მიხედვით 2018 წლის განმავლობაში თბილისში კვადრატული მეტრის გასაშუალოებულმა ფასმა 1,764 ლარი შეადგინა. ლარებში კვადრატული მეტრის ფასი 2017 წელთან შედარებით 6%-ით არის გაზრდილი. 

იმ დაშვებით, რომ თბილისში გაყიდული ბინის საშუალო ზომა 67 კვადრატული, ხოლო კვადრატული მეტრის საშუალო ფასი 1,764 ლარია, საშუალო ბინის ფასი 118,188 ლარი გამოდის. 

2018 წლის ბოლოს ქვეყანაში იპოთეკური სესხების ზრდამ 30%-ს გადააჭარბა. TBC კაპიტალის შეფასებით, აღნიშნული ზრდა სავარაუდოდ ფიზიკური პირების დაკრედიტების წესის ცვლილებას უკავშირდებოდა, რომელიც პოტენციურად ათასობით ადამიანისთვის გაართულებდა იპოთეკური სესხის აღებას, რის გამოც მათ 2019 წლის პირველ იანვრამდე ამჯობინეს ბინების შეძენა. 

დოკუმენტის მიხედვით, ცენტრალურ უბნებში რეალიზაციის მნიშვნელოვანი ნაწილი დიდი ფართობის ბინებზე მოთხოვნით არის განპირობებული, ხოლო გარეუბნებში შედარებით პატარა ბინების გაყიდვები ჭარბობს. 

“ახალი სამშენებლო რეგულაციების ფონზე, თბილისში საცხოვრებელი უძრავი ქონების მშენებლობაზე გაცემული ნებართვები წინა წელთან შედარებით 45%-ით არის შემცირებული. თიბისი კაპიტალის გათვლებით, ნებართვების კლება საცხოვრებელი ფართობის მიწოდების ვარდნაში 2021 წლის დასრულებულ მშენებლობებში აისახება. 

ყველაზე ძვირი უბნის სტატუსს მთაწმინდა ინარჩუნებს. მსგავს ქალაქებთან შედარებით თბილისში ბინების ფასები უფრო იაფია როგორც გარეუბნებში, ასევე ქალაქის ცენტრში, რაც სამომავლო ზრდის შესაძლებლობაზე მიუთითებს. გრძელვადიან პერსპექტივაში თიბისი კაპიტალი საცხოვრებელი უძრავი ქონების ფასების ნელ და სტაბილურ ზრდას პროგნოზირებს, ახლო მომავალში ზომიერი ბალანსის შენარჩუნებით. 

სექტორისთვის დამახასიათებელი ფუნდამენტური კრიტერიუმები ჯანსაღად გამოიყურება, რაც უძრავი ქონების ბაზრის „გადახურების“ საშიშროებას გამორიცხავს,”- წერია ანგარიშში.

 

წყარო: bm.ge

საკონტაქტო ინფორმაცია
თბილისი, მიცკევიჩის ქ. N°11
574-77-24-04
0322 728-528
skype www.Myclient.ge
info@myclient.ge