სტატისტიკის ეროვნულმა სამსახურმა დღეს 2019 წლის მარტის ეკონომიკური ზრდის წინასწარი შეფასება გამოაქვეყნა, რომლის მიხედვითაც, მშენებლობის დარგში ეკონომიკური აქტივობის შემცირებაა. კონკრეტული რიცხვი, თუ რამდენად შემცირდა მარტში ამ სექტორში ჩართული კომპანიების ბრუნვა მითითებული არაა, თუმცა ხაზგასმულია, რომ ზრდა ნეგატიური იყო. 

სამშენებლო სექტორის შემცირება 2018 წელს დაიწყო. გასულ წელს ამ დარგში აქტივობამ 3.1%-ით იკლო. 

რაც შეეხება ეკონომიკის სხვა დარგებს, საქსტატის მონაცემებით, ზრდა შეიმჩნევა ვაჭრობის, ტრანსპორტის, უძრავი ქონებით ოპერაციებისა და მომხმარებლისთვის სხვა სახის მომსახურების გაწევის დარგებში. ასევე, ზრდა დაფიქსირდა კომუნალური, სოციალური და პერსონალური მომსახურების გაწევის დარგში. 

საქსტატის მონაცემები წინასწარია და ის ეკონომიკის ცალკეული სექტორების მიმართულებით არსებული ზრდის დეტალურ მაჩვენებლებს არ მოიცავს.

დღესვე საქსტატმა 2019 წლის პირველ კვარტალში გაცემული სამშენებლო ნებართვების სტატისტიკაც გამოაქვეყნა. დოკუმენტის მიხედვით, ამ პერიოდში 2052 სამშენებლო ნებართვა გაიცა, რომლის საერთო ფართობიც 1,378,100 კვადრატული მეტრია. ეს 2018 წელთან შედარებით 7.8%-ით მეტია. ნებართვების 71,6 პროცენტი მოდის ქვეყნის 3 რეგიონზე. კერძოდ, ჩასატარებელი სამშენებლო სამუშაოების 50,0 პროცენტი - თბილისზე, 11,1 პროცენტი – აჭარაზე და 10,5 პროცენტი – ქვემო ქართლის რეგიონზე ნაწილდება.