პარლამენტმა არქიტექტურული საქმიანობის რეგულირებისთვის კანონპროექტის განხილვა დაიწყო. 

დოკუმენტი საქართველოს არქიტექტორთა კავშირმა მოამზადა და ის არქიტექტორების სერტიფიცირებას, მათთვის ხუთ წელიწადში ერთხელ პროფესიული გამოცდების ჩატარებას და სხვა სიახლეებს ითვალისწინებს. ამ სავალდებულო ტესტირების ორგანიზება კი, თავის მხრივ, საქართველოს არქიტექტორთა პალატამ უნდა უზრუნველყოს - ეს ახალი საჯარო სამართლის იურიდიული პირია, რომლის შექმნასაც კანონპროექტი ითვალისწინებს. 

სწორედ ამ ახალი სსიპ-ის უწყების საჭიროებასა და უფლებებზე გუშინ პარლამენტის დარგობრივი ეკონომიკისა და ეკონომიკური პოლიტიკის კომიტეტის სხდომაზე კანონპროექტის განხილვისას დისკუსია გაიმართა. 

საპარლამენტო უმრავლესობის წევრი გიორგი ბეგაძე მიიჩნევს, რომ არქიტექტორის ცოდნა, რომელსაც უმაღლესი განათლების დამადასტურებელი დიპლომი აქვს და საქმიანობას იწყებს, დამატებით სხვა ორგანომ არ უნდა შეამოწმოს, რადგან ამ შემთხვევაში საგანმანათლებლო დაწესებულებების დატვირთვა აზრს დაკარგავს. 

"ორი აზრი არ არსებობს, რომ კვალიფიკაციასა და გაწეული საქმიანობის ხარისხზე უნდა ვიზრუნოთ და ნაბიჯები უნდა გადავდგათ, როგორც არქიტექტორების კვალიფიკაციის კუთხით, ასევე სხვა პროფესიების კუთხით, თუმცა წარმოდგენილი კანონპროექტით ბევრი ისეთი საკითხია, რომელიც ჩემი აზრით, ახალი ბარიერების შექმნას იწვევს მათთვის, ვისაც ეს განათლება მიღებული აქვთ. ჩვენთან ამ მიმართულებით უმაღლესი განათლება არსებობს, ბაკალავრიატის და მაგისტრის ხარისხი და ვფიქრობ, ამ მიმართულებით ადამიანებს საქმიანობა შეზღუდული არ უნდა ჰქონდეთ.

ასევე მნიშვნელოვანია, რომ არქიტექტურული პალატა ჩაატარებს ტესტირებას. აქაც არ არის ცნობილი, რა გამოცდებზეა საუბარი, რა ტესტირებაზე, როგორი თემატიკის იქნება", - განაცხადა ბეგაძემ და დასძინა, რომ მას ამ სახით კანონპროექტის მხარდაჭერა გაუჭირდება. 

ამ მოსაზრების საპასუხოდ, კანონპროექტის ავტორმა, არქიტექტორთა კავშირის თავმჯდომარემ დავით აბულაძემ განაცხადა, რომ სერტიფიცირებას არიტექტორთა პალატა უზრუნველყოფს, თუ რომელიმე სხვა ორგანო, ეს ჯერ კიდევ მსჯლობის საგანია. 

აღნიშნული სიახლეები "საქართველოს სივრცის დაგეგმარების, არქიტექტურული და სამშენებლო საქმიანობის კოდექსში" ცვლილებების შეტანას ითვალისწინებს. ჯერ-ჯერობით, უცნობია, რა გავლენა ექნება საბიუჯეტო ხარჯებზე წარმოდგენილ ცვლილებებს. 

დარგობრივი კომიტეტის წევრებმა ამ საკითხზე დამატებითი კონსულტაციების გამართვა ითხოვეს, რის შემდეგაც კომიტეტი თემის განხილვას დაუბრუნდება.